www.factor.am կայքից տեղեկանում ենք, որ Վարչապետ Նիկոլ Փաշինյանն այցելել է Վեդիի ջրամբար՝ տեղում ծանոթանալու կառուցման աշխատանքների ավարտական փուլին և ջրամբարի շահագործման հեռանկարներին։ Այցի ընթացքում պատասխանատուները վարչապետին են ներկայացրել ջրամբարի տեխնիկական հնարավորությունները, ջրալցման ընթացքն ու ոռոգման համակարգի նոր լուծումները։ Ջրամբարի աշխատանքների պատասխանատուների փոխանցմամբ՝ ջրամբարի կառուցման աշխատանքներն ամբողջությամբ ավարտված են, և ներկայումս ընթանում է փաստաթղթավորման գործընթացը։ «Այս պահին ջրամբարում առկա է շուրջ 11.8 – 12 միլիոն խորանարդ մետր ջուր։ Չնայած ջրի ներհոսքը ներկայումս կազմում է 0.7 լ/վայրկյան, այն կրճատվել է՝ գյուղացիներին ոռոգման ջուր տրամադրելու նպատակով։ Ծրագրվում է, որ ջրամբարն ամբողջությամբ կլցվի մինչև 2027 թվականը»։ Վարչապետին տեղում հայտնեցին, որ Վեդու ջրամբարն առանձնանում է իր տեխնոլոգիական հագեցվածությամբ։ «Պատվարի մեջ տեղադրված են հատուկ սենսորներ, որոնք հնարավորություն են տալիս իրական ժամանակում վերահսկել խոնավության ներթափանցման մակարդակը։ Սա Հայաստանում նմանատիպ առաջին ջրամբարն է, որն ունի նմանատիպ ավտոմատացված կառավարման համակարգ։ Ջրամբարն ունի երկու հիմնական խողովակաշար. 1400 մմ տրամագծով՝ վթարային արագ դատարկման համար՝ վայրկյանում 27 խմ թողունակությամբ, որն անհրաժեշտ է սեյսմիկ կամ այլ վտանգների դեպքում, և 800 մմ տրամագծով՝ ոռոգման նպատակների համար, որը կառավարվում է համակարգչայինացված շարժիչներով»։