Արմավիր համայնքի ղեկավար՝ Վարշամ Սարգսյանը իր ֆեյսբուկյան էջում նախօրեին հայտարարություն է տարածել, որում ասում է․ -«Սիրել՜ի ուսանողներ, ինչպես պայմանավորվել էինք և ինչպես խոստացել էի, սեպտեմբերի 1-ից Արմավիր համայնքի բոլոր բնակավայրերից և քաղաքից ուսանողական ավտոբուսները մեր ուսանողներին կտեղափոխեն անվճար դեպի Երևան։ Մրցույթային գործընթացներն արդեն ավարտվել են։ Մի քանի օրից Արմավիրի կենտրոնական հրապարակում կկազմակերպենք ավտոբուսների տեխնիկական ստուգատես և դրանից հետո կունենանք պայմանագիր։ Սեպտեմբերի 1-ից Արմավիր համայնքի բոլոր ուսանողները հնարավորություն կունենան ուսանողական ավտոբուսներով անվճար գնալ ուսումնական հաստատություններ դեպի Երևան։ Այս գործընթացը կշարունակվի այնքան ժամանակ, մինչև Արմավիր-Երևան կանոնավոր ուղևորափոխադրումների հարցը վերջնական լուծում ստանա։ Ուզում եմ նաև տեղեկացնել, որ  փաստաթղթերի ներկայացման գործընթացը մի քանի օրից կսկսվի, մենք կրկին հայտարարություն կունենանք այս թեմայով, կտեղեկացնենք ի՞նչ փաստաթուղթ է անհրաժեշտ ներկայացնել Արմավիրի համայնքապետարան, որպեսզի ունենաք ուսանողական տոմսեր ավտոբուսներից օգտվելու համար։ Այսքանը, ցանկանում էի այս կարևոր նորությամբ կիսվել Ձեզ հետ»։